पहिलो चरणअन्तर्गत मतदान सुरू

प्रतिनिधिसभा र प्रदेशसभा सदस्यका लागि पहिलो चरणअन्तर्गत हिमाली र पहाडी ३२ जिल्लामा आइतबार मतदान हुँदैछ । दुवै सभाका लागि प्रत्यक्षतर्फ ७ सय २ उम्मेदवार प्रतिस्पर्धामा छन् ।
प्रतिनिधिभा सदस्यका लागि २ सय ६६ पुरुष र १६ महिला उम्मेदवार छन् । त्यस्तै प्रदेशसभा सदस्यका लागि ४ सय पुरुष र २० महिला उम्मेदवार मैदानमा छन् ।
प्रमुख निर्वाचन आयुक्त अयोधीप्रसाद यादवले यो निर्वाचन संविधान कार्यान्वयनको महŒवपूर्ण कडीका रूपमा रहेकाले सबै मतदातालाई  मतदानमा सहभागी हुन अपिल गरेका छन् । ‘पहिलो चरणमा हुने प्रतिनिधिसभा र प्रदेशसभा सदस्य निर्वाचनअन्तर्गत मतदानका लागि सम्पूर्ण तयारी पूरा भएको छ,’ आयोगमा शनिबार आयोजित पत्रकार सम्मेलनमा प्रमुख आयुक्त यादवले भने, ‘आइतबार बिहान ७ देखि बेलुकी ५ बजेसम्म आआफ्नो मतदान केन्द्रमा उत्साहका साथ उपस्थित भई मतदानमा सरिक हुन सबै मतदातालाई अनुरोध छ ।’
पहिलो चरणको मतदानबाट दुवै सभाका लागि १ सय ११ जना निर्वाचित हुनेछन् । प्रतिनिधिसभातर्फ ३७ सदस्य र प्रदेशसभातर्फ ७४ सदस्य चुनिनेछन् ।
पहिलो चरणको निर्वाचनमा मतदाताको संख्या ३१ लाख ९१ हजार ९ सय ४५ छ ।  त्यसमध्ये १६ लाख ९१ हजार ९ सय ४५ पुरुष र १५ लाख ८६ हजार ५ सय २ जना महिला मतदाता छन् ।
मतदानका लागि ३२ जिल्लामा २ हजार ९ सय १९ मतदान स्थल र ४ हजार ४ सय ६५ मतदान केन्द्र कायम गरिएको छ ।
प्रदेश नम्बर १ का सोलुखुम्बु, संखुवासभा, भोजपुर, ओखलढुंगा, ताप्लेजुङ, पाँचथर, खोटाङ, प्रदेश नम्बर ३ का नुवाकोट, रसुवा, धादिङ, सिन्धुपाल्चोक, दोलखा, रामेछाप, प्रदेश ४ का मुस्ताङ, म्याग्दी, बागलुङ, मनाङ, लमजुङ, गोरखा,
प्रदेश ५ का पूर्वी रूकुम, रोल्पा, प्रदेश ६ का पश्चिम रुकुम, जाजरकोट, हुम्ला, मुगु, जुम्ला, कालिकोट, डोल्पा र  प्रदेश नम्बर ७ का दार्चुला, बझाङ, बाजुरामा आइतबार मतदान हुँदैछ ।  प्रतिनिधिसभा सदस्यका लागि २७ जिल्लामा एक÷एक र पाँच जिल्लामा दुई÷दुई निर्वाचन क्षेत्र कायम गरिएको छ । दुई निर्वाचन क्षेत्र हुने जिल्लामा नुवाकोट, धादिङ, सिन्धुपाल्चोक, बागलुङ र गोरखा छन् ।